លោក កឹម សុខា អតីតប្រធានអតីតគណបក្សសង្គ្រោះជាតិ បន្តទទួលជួប លោកជំទាវ Tina Redshaw នៃប្រទេសអង់គ្លេសប្រចាំនៅកម្ពុជា
14-November-2019 | ដោយ ពលមនសិការ
ភ្នំពេញ៖ លោក កឹម សុខា អតីតប្រធានអតីតគណបក្សសង្គ្រោះជាតិ បន្តទទួលជួប លោកជំទាវ Tina Redshaw ឯកអគ្គរាជទូត នៃប្រទេសអង់គ្លេសប្រចាំនៅកម្ពុជា ព្រឹកថ្ងៃទី១៤ ខែវិច្ឆិកា ឆ្នាំ២០១៩។ ជំនួបនេះធ្វើនៅផ្ទះលេខ៩៧ ផ្លូវ៣១៣ សង្កាត់បឹងកក់២ ខណ្ឌទួលគោក រាជធានីភ្នំពេញ។
រហូតមកដល់ពេលនេះ មានអគ្គរដ្ឋទូតបរទេសចំនួន៧រូបហើយ បានចូលជួបលោក កឹម សុខា បន្ទាប់ពីលោកទទួលបានសិទ្ធិច្រើនជាងមុន ក្នុងនោះមានអគ្គរដ្ឋទូតអាមេរិក អគ្គរដ្ឋទូតអាល្លឺម៉ង់ អគ្គរដ្ឋទូតអូស្ត្រាលី អគ្គរដ្ឋទូតបារាំង អគ្គរដ្ឋទូតអឺរ៉ុបប្រចាំនៅកម្ពុជា អគ្គរាជទូតជប៉ុន និងឯកអគ្គរាជទូត នៃប្រទេសអង់គ្លេសប្រចាំនៅកម្ពុជា។
លោក កឹម សុខា អតីតប្រធានគណបក្សសង្គ្រោះជាតិ បានឱ្យដឹងថាកាលពីថ្ងៃទី០៧ ខែវិច្ឆិកា ឆ្នាំ២០១៩ថា សហមេធាវីការពារសិទ្ធិរបស់លោក បានដាក់ពាក្យស្នើសុំឲ្យចៅក្រមស៊ើបសួរ លើកលែងបទចោទមកលើរូបលោក។ ប៉ុន្តែសេចក្តីសម្រេចរបស់ចៅក្រមក្នុងថ្ងៃនោះ មិនមែនជាការលើកលែងការចោទប្រកាន់ឡើយ គឺត្រឹមតែជាការកែប្រែលក្ខខ័ណ្ឌនៃកាតព្វកិច្ចមួយចំនួនតែប៉ុណ្ណោះ។
លោកបន្តថា ក្នុងនាមជាបុគ្គលស្អាតស្អំម្នាក់ដែលត្រូវបានរងការឃុំខ្លួនទាំងគ្មានកំហុស២ឆ្នាំមកហើយ លោកនៅតែបន្តទាមទារឲ្យទម្លាក់ចោលបទចោទប្រកាន់មកលើរូបលោក។ លោក កឹម សុខា រំពឹងថាសេចក្តីសម្រេចក្នុងថ្ងៃនោះគឺជាជំហ៊ានទី១ ប៉ុន្តែរូបលោកក៏ដូចជាពលរដ្ឋខ្មែរដទៃទៀតដែលបានបាត់បង់សិទ្ធិសេរីភាពនយោបាយនៅតែត្រូវការដំណោះស្រាយនិងយុត្តិធម៌ពិតប្រាកដ។
ជាចុងក្រោយនេះ លោកសូមផ្ញើសេចក្តីនឹករលឹកយ៉ាងខ្លាំងដល់ប្រជាពលរដ្ឋខ្មែរ ហើយលោកនឹងទៅជំរាបសួរសុខទុក្ខបងប្អូនប្រជាពលរដ្ឋនាពេលដ៏ខ្លីខាងមុខនេះ។ លោកនឹងជំរាបជូនដំណឹងលំអិតនៅពេលក្រោយ។
គួរបញ្ជាក់ថាលោក កឹម សុខា អតីតប្រធានគណបក្សសង្គ្រោះជាតិ ត្រូវបានកម្លាំងសមត្ថកិច្ចចាប់ខ្លួននៅវេលាម៉ោង០០នឹង៣៥នាទីយប់ឈានចូលថ្ងៃទី៣ ខែកញ្ញា ឆ្នាំ២០១៧ ពាក់ព័ន្ធនឹងទង្វើក្បត់ជាតិ។ ដោយធ្វើតាមបញ្ជារបស់មហាអំណាចអាមេរិកដើម្បីផ្តួលរំលំរាជរដ្ឋាភិបាលកម្ពុជាដោយ គំរូនឹងប្រទេសយូហ្គោស្លាវី និងសើប៊ី។ លោក កឹម សុខា ត្រូវបានចាប់ខ្លួននៅផ្ទះរបស់លោកស្ថិតនៅផ្ទះលេខ៩៧ ផ្លូវ៣១៣ សង្កាត់បឹងកក់២ ខណ្ឌទួលគោក។
ការចាប់ខ្លួនលោក កឹម សុខា ធ្វើឡើងបន្ទាប់ពីវីដេអូមួយ ដែលលោក កឹម សុខា ប្រធានគណបក្សសង្គ្រោះជាតិបាន និយាយសារភាពកាលពីថ្ងៃទី៨ ខែធ្នូ ឆ្នាំ២០១៣ នៅ ប្រទេសអូស្ត្រាលី ថាខ្លួនបានធ្វើតាមបញ្ជារបស់មហាអំណាចអាមេរិក ក្នុងការរៀបចំផែនការផ្តួលរំលំរាជរដ្ឋាភិបាលកម្ពុជា ដោយយកគំរូទៅនឹងប្រទេសយូហ្គោស្លាវី និងសើ ប៊ី ដែរ ៕
ចំនួនអ្នកទស្សនា
- ថ្ងៃនេះ5611
- ម្សិលមិញ20231
- សប្តាហ៍នេះ84691
- ខែនេះ106571
- ឆ្នាំនេះ106571
- សរុប20549027